Ao longo do mes de novembro desenvolveranse no noso centro as actividades do Programa Revitaliza de compostaxe da Deputación de Pontevedra e o CEIDA. O programa consta de xornadas de formación para o profesorado, charlas, obradoiros e exposicións. O obxectivo deste plan é difundir a compostaxe entre os nenos e nenas dos centros escolares para concienciar sobre a necesidade de tratar o lixo de forma sostible e formalos para que respecten o Medio Ambiente.
Este taller ía dirixido ao alumnado de 5º e 6º de infantil, levaba por título "A tribo dos Ecobechos". Con esta proposta aprendemos o proceso de elaboración do compost e os bichiños que trituran a materia orgánica para axudar a coidar a nosa terra.
O seguinte taller foi a charla-coloquio "A voltas coa compostaxe", dirixido ao alumnado do 2º e 3º ciclo, foi un achegamento ao tema do lixo doméstico e o proceso de compostaxe da fracción orgánica. Tamén poderemos gozar da exposición itinerante sobre a compostaxe ao longo desta quincena.
O terceiro taller estivo dirixido a: 5º e 6º de educación infantil, 1º e 3º ciclo de primaria. Titulouse: "Posta en marcha do composteiro". María e Manolo, os monitores de Revitaliza, amosáronnos o que temos que botar no noso composteiro escolar. Sempre debemos equilibrar a cantidade de materia orgánica húmida (restos de comida das merendas e comedor escolar) coa materia estructurante (materiais secos procedentes das pólas trituradas, follas, ourizos...), de vez en cando remexer esta mestura e así poder acadar un compost axeitado. Puidemos comprobar como o noso composteiro chegaba a 42º de temperatura.
O último taller de Revitaliza tivo por título: "Quen vive aí?" e estivo dirixido ao alumnado de 3º e 4º de Educación Primaria. Coa axuda de sinxelos capturadores de fauna, material de aumento e chaves dicotómicas, puidemos identificar aos invertebrados presentes no composteiro e sinalar a súa función no proceso da compostaxe. Resultou moi interesante, algún bichiño casi escapa da mesa.
Comentarios
Publicar un comentario