O 5 de decembro celébrase o Día Munidal do Chan co obxectivo de sensibilizar da importancia dun solo saudábel e promover a xestión sustentábel dos recursos do mesmo. O chan baixo os nosos pés é un mundo composto de milleiros de organismos vivos, de minerais e materia orgánica que proporciona alimentos a humanos e animais a través do crecemento das plantas. Do mesmo xeito ca nós, os chans necesitan unha achega equilibrada e variada de nutrientes en cantidades apropiadas para estar saudables. Cando se cultiva a terra, crecen as plantas e os devanditos nutrientes elimínanse do chan, polo que é necesario realizar un seguimento e xestión adecuados para revitalizalos e facer que as plantas futuras medren de novo en condicións óptimas e poidan aportar os nutrientes necesarios para alimentar áos animas e ás persoas.
O alumnado de 3º curso participou nesta conmemoración desenvolvendo o Proxecto de Biblioteca: "Compromiso co Medio que nos rodea" e o programa de Voz-Natura sobre a paisaxe, tratando de concienciar aos nenos e nenas da importancia de recuperar as paisaxes autóctonas de Galicia como son os soutos e as carballeiras. Aportou o seu traballo e toda a ilusión nun proceso laborioso, realizando as tarefas de sementeira en area e no bancal da horta con castañas e landras, esperando que xermolen e medren o suficiente para ser transplantadas na primavera en solos fértiles que reúnan as condicións necesarias para o seu crecemento e poidan convertirse nuns frondosos e fermosos castiñeiros e carballos.
Comentarios
Publicar un comentario