O xoves 23 de marzo o alumnado de 1º, 2º e 3º de primaria visitaron o Porto do Testal en Noia, alí observaron as embarcacións de marisqueo. A continuación achegáronse ata a lonxa para coñecer as súas instalacións e o seu funcionamento. Despois visitaron a depuradora da Cofradía de Pescadores para observar como se realiza a depuración de moluscos bivalvos e o etiquetado do berberecho de Noia. Na Praza de Abastos puideron atopar moitas especies de peixe e marisco, foron polos postos identificando as especies e falando coas/os praceiras/os para comentar os prezos e a forma de preparar o peixe.
A media mañá fixéronlle entrega dunha merendola mariñeira coa finalidade de coñecer os alimentos do mar e as súas propiedades nutricionais.
Foi unha fermosa experiencia para o noso alumnado.
Esta actividade forma parte do Plan Proxecta:“Aliméntate ben”, na modalidade: "Ti si que es un Bo Peixe". Consiste nunha estratexia educativa para previr o sobrepeso e a obesidade . É un programa creado pola Consellería do Mar co dobre obxectivo de facilitar o coñecemento e consumo dos produtos en conserva do mar de Galicia entre as nenas e nenos de nosa comunidade e de incidir e equilibrar as súas dietas alimentarias.
Preténdense traballar todas as dimensións do feito alimentario dun xeito integral e transversal na comunidade de referencia do alumnado. Responde á necesidade de que o alumnado adquira e consolide hábitos alimentarios adecuados e desenvolva as competencias necesarias para facer eleccións saudables no futuro. Para acadar estes obxectivos, convídaselles a coñecer a contorna alimentaria a través de experiencias sensoriais, a valorar o noso patrimonio alimentario tradicional, a reflexionar sobre a influencia do medio (publicidade, dispoñibilidade de alimentos, industria alimentaria) e as súas consecuencias sobre o estado de saúde, entre outras, co fin de desenvolver un comportamento crítico como consumidores responsables fronte á oferta alimentaria actual.
Comentarios
Publicar un comentario