Hoxe foi un día especial no noso colexio . Durante a primeira hora da mañá chegou a visita de Diego Rois, director técnico da Asociación de Avicultores da Raza Galiña de Mos, AVIMÓS. Os membros desta asociación, contando co apoio da Administración Galega, quixeron recuperar esta raza en perigo de extinción e darlle a importancia que se merece organizando un programa de recuperación, conservación e fomento desta casta.
Trátase dunha galiña orixinaria de Galicia, unha das razas máis antigas da Península Ibérica, aínda que nas últimas décadas estivo a piques de desaparecer mesmo podemos gozar da súa beleza e calidade dos seus produtos coma noutros tempos. É unha galiña moi dura, que se adapta perfectamente a unhas condicións meteorolóxicas adversas; posúe unha crista pequena, en chícharo, con tres filas de papilas ou puntos. Debe o seu nome á parroquia de San Xiao de Mos, no concello de Castro de Rei, Lugo, xa que foi nesta zona onde se comezou o proceso de selección para a recuperación da raza orixinaria.
Arredor das dez da mañá chegou Diego cunha incubadora e vinte ovos da Raza de Mos. Situou o aparato na entrada principal do colexio, ao lado da exposición de froitas do outono e fixemos dous grupos para poder escoitar as súas explicacións e observar mellor os ovos. Contounos que para que nazan os pitos os ovos teñen que estar fecundados por un galo, despois deben estar 21 días a unha temperatura de 37,8 graos e ter un 45% de humidade. A incubadora posúe un sistema de volteo automático, move diariamente os ovos para que teñan unha temperatura uniforme, o mesmo que fai a galiña no seu proceso natural. O día 19 de outubro voltará de novo Diego, xa estarán nados os pitiños, ímos poder tocalos e indicaranos como debemos coidalos a partir dese intre.
Vai ser emocionante esta aventura!!
Comentarios
Publicar un comentario