Nesta primeira semana de curso tivemos a oportunidade de observar no colexio a unha eiruga moi fermosa, trátase dun PAPILIO MACHAON. Ari, de 5º de primaria, tivo a xentileza de compartir con nós esta bonita experiencia. Ao chegar o outono, esta eiruga aparécelle polos arredores da súa casa e este ano meteuna nun terrario para amosarnos a súa metamorfose. Despois Ari, con moito ánimo, preparou unha pequena charla informativa para os nenos e nenas de educación infantil xunto aos seus compañeiros de aula María e Pablo. O resto dos cursos de primaria tamén gozaron da presenza desta bela eiruga.
O macaón, Papilio machaon, tamén coñecida como cola de andoriña, galo ou voíña, é unha das bolboretas máis comúns de Europa, mais este insecto tende a desaparecer dende hai algunhas ducias de anos. O seu hábitat comprende dende o nivel do mar ata os 2.000 metros, en prados e zonas floreadas. O macaón ten entre 32 e 56 mm de envergadura e caracterízase polas prolongacións que posúe nas ás posteriores. A eiruga é moi rechamante e, se se sinte ameazada pode sacar un órgano de defensa glandular de cor laranxa chamado osmaterium. A crisálide( estado inactivo do insecto dentro do casulo no que está encerrado antes de converterse en bolboreta) é xeralmente de cor verde ou gris parda. A eiruga adoita comer ruda ou fiuncho, a do noso cole naceu nunha planta de ruda e traémoslle pólas frescas todos os días. Cando se transforma en bolboreta aliméntase do néctar de varias flores e volve poñer os ovos sobre fiuncho ou ruda para que se poidan alimentar as eirugas da seguinte xeración.
Cando a eiruga termina de facer o casulo métese dentro, onde estará inmóbil durnte todo o proceso de transformación, con aspecto de eiruga durante un ou dous días. Despois xa pasa a ser unha crisálide ou ninfa, permanecerá así entre 12 días ou 6 meses, dependendo das condicións meteorolóxicas, a súa posición será mirando hacia arriba ou en horizontal e colgando dun fío, neste momento necesita tranquilidade para unha boa transformación en bolboreta.
Aínda que a cor e o tamaño da eiruga son moi chamativos é completamente inofensiva e non supón un perigo para as persoas e os animais, nin sequera para as súas plantas nutricias. Lembra que come ruda e fiuncho , non vai atacar nada da horta nin ser unha molestia, se tes a sorte de vela goza do espectáculo e deixaa seguir alimentándose.
Comentarios
Publicar un comentario