Xa temos de novo os buxos da carballeira con vermes, trátase da Cydalima perspectalis, coñecida co nome de avelaíña do buxo, é un insecto invasor cuxo alimento son as follas dos arbustos da familia buxus.
A bióloga Rosa Pérez Otero, da Estación Fitopatolóxica de Areeiro en Pontevedra, sinala que “as primeiras observacións en Galicia foron a finais do verán de 2014”. O máis probable é que chegase en plantas ornamentais desde Asia introducidas en contedores que non pasaran controis fitosanitarios nos portos de saída. “Esta praga, como todas as que veñen do leste de Asia veu para quedar”. “Os vermes desta avelaíña, as eirugas, comen as follas aínda que poden darse casos de afectar a coda da árbore e por aí poden entrar os fungos” que logo poden acabar co buxo.
"As eirugas dentro dos seus niños non entran en contacto coa substancia insecticida porque os casulos son de fíos de seda moi dura e logo cubertos polas follas da árbore” di Pérez Otero. “A mellor maneira é aplicar unha presión maior en canto se aplique o biocida, é dicir, non serve un aparello normal para desinfectar as plantas, debe aplicarse con moita forza por toda a árbore”, destaca Pérez Otero. Outra forma de combater a avelaíña do buxo é o uso de trampas con feromonas. Isto reduce a posibilidade de reprodución da especie.
En Europa observouse como algúns paxaros cazaban estes insectos, mais ao final non os comían. Descoñécese o motivo, aínda que é probable que os insectos invasores non teñan as cualidades dos insectos autóctonos para seren consumidos por aves insectívoras de Europa.
Nós fumigamos a semana pasada co Bacillus thuringiensi, unha especie bacteriana grampositiva, que vive no solo, usada comunmente como pesticida biolóxico. Teremos que seguir observando periodicamente e facer máis aplicacións do produto.
Comentarios
Publicar un comentario