EDUCANDO CON MALIBÚ.

 

Hoxe coñecemos a Malibú, a cadeliña adoptada pola Casa Grande de Xanceda. A súa historia é moi interesante, pois levaba varios días soa e perdida percorrendo a estrada que leva a esta granxa, cando unha das traballadoras decide parar, baixarse do  coche e recollela. Puxeron carteis e avisos para atopar aos seus donos, mais non apareceu ninguén. A granxa non é unha protectora de animais, pero como todos os traballadores e traballadoras lle colleran cariño decidiron acollela, agora xa forma parte da familia desta granxa e con ela iniciaron un proxecto superinteresante sobre o abandono animal que leva por título: “Educando con Malibú”

Malibú convertiuse nunha profe-cadela, acompañada de Adriana, unha persoa do equipo de Xanceda, percorre os colexios de Galicia educando aos nenos e nenas no coidado e amparo dos animais A educación en valores é moi importante para que as futuras persoas donas de animais sexan responsables e podendo chegar así a acabar co abandono animal.

 Esta cadeliña converteuse en símbolo desta loita, fomentando en cada colexio a acollida de animais abandonados, educando en solidariedade e en respecto aos animais .

O mes de Abril é representado cun lazo laranxa para simbolizar a loita polos dereitos dos animais. Sensibilizar contra o abandono e os malos tratos aos animais, así como concienciar sobre a tenencia responsable de mascotas e fomentar as adopcións, son algúns dos obxectivos que queremos inculcar no noso alumnado e na sociedade. 

O CEIP Xoaquín Loriga (Prado), en colaboración co CEIP Xesús Golmar (Lalín), CEIP Pío Cabanillas Gallas (Dozón), CEIP Nosa Señora de Xuvencos (Boborás), CEIP Terras de Maside (Maside) e Clinica Veterinaria Golmar (Lalín),  desenvolvemos un proxecto de concienciación colectiva baixo o lema "Xuntos contra o maltrato animal",  traballando todos estes valores que Malibú nos quere transmitir. A todos, moitas grazas por participar e colaborar. 

Para evitar que os animais sufran, nós falamos por eles.

Foi un pracer coñecerte Malibú!!