OBRADOIRO CON EDUCALECRÍN

 Hoxe acompañáronnos Natalia e Verónica da cooperativa Educalecrín para falarnos da importancia da auga. Esta actividade estaba dirixida ao alumnado de 5º e 6º de primaria e subvencionada pola Concellería de Medio Ambiente  de Lalín.

Comezaron cunha introdución teórica sobre a importancia da auga, xa que é un elemento  vital para o noso planeta, pois  hai ecosistemas inteiros que dependen totalmente dela. Cando nun ecosistema acuático a auga é cristalina e inodora indica que non hai contaminación, pola contra, cando hai  moita vexetación na auga do río, debido á abundancia de nitratos e fósforo é mostra dun  alto nivel de contaminación.

Nos ecosistemas saudables predominan especies arbóreas coma os ameneiros,  as súas follas e cortiza  empréganse como tintes naturais. A fauna que habita nesta contorna adoita ser: a londra, a tartaruga común, o sapo común, o zapateiro ( gerris lacustris), as libélulas, as troitas e os peixes. 

As augas contamínanse debido á mala prácticas da industria, ao aumento das temperaturas, ao uso de pesticidas na agricultura e á deforestación. Debemos de mudar os nosos actos: usar nutrientes e pesticidas naturais, mellorar o tratamento das augas residuais, acabar coa deforestación, facer que a agricultura e a industria sexan máis sostibles e reducir o consumo de plásticos.

Despois xa pasaron á parte práctica. Observamos o ph dos líquidos facendo experimentos,  mesturaron  a auga da lombarda cocida con outros produtos coma:  o vinagre,  o limón, a lixivia, o bicarbonato e  a auga da chuvia, decatándonos sorprendentemente como a mestura iba mudando de cor. Remataron realizando unha morea de actividades en pequeno e gran grupo, nas que o alumnado tivo que recordar os conceptos traballados para resolver as actividades. Resultou unha actividade moi interesante e motivadora.