Hoxe no centro gozamos co obradoiro "Ti si que es un bo peixe".. As dúas monitoras especialistas informáronnos das características e beneficios de distintos peixes, mariscos e algas. Despois desfrutamos coa coreografía dunha canción con temática nutritiva e rematamos con actividades lúdicas: pescando, mariscando e resolvendo crebacabezas. Resultou unha xornada moi entretida.
Esta actividade forma parte do Plan Proxecta:“Aliméntate ben”, na modalidade: "Ti si que es un Bo Peixe". Consiste nunha estratexia educativa para previr o sobrepeso e a obesidade . É un programa creado pola Consellería do Mar co dobre obxectivo de facilitar o coñecemento e consumo dos produtos en conserva do mar de Galicia entre as nenas e nenos de nosa comunidade e de incidir e equilibrar as súas dietas alimentarias.
Preténdense traballar todas as dimensións do feito alimentario dun xeito integral e transversal na comunidade de referencia do alumnado. Responde á necesidade de que o alumnado adquira e consolide hábitos alimentarios adecuados e desenvolva as competencias necesarias para facer eleccións saudables no futuro. Para acadar estes obxectivos, convídaselles a coñecer a contorna alimentaria a través de experiencias sensoriais, a valorar o noso patrimonio alimentario tradicional, a reflexionar sobre a influencia do medio (publicidade, dispoñibilidade de alimentos, industria alimentaria) e as súas consecuencias sobre o estado de saúde, entre outras, co fin de desenvolver un comportamento crítico como consumidores responsables fronte á oferta alimentaria actual.
Comentarios
Publicar un comentario