A DEFENSA DAS NOSAS ESPECIES: O NOSO MELLOR LEGADO

Xa comezamos o novo curso escolar 2023/24. Este ano o Proxecto Anual do centro que parte da Biblioteca Escolar (incluída no PLAMBE) e engloba o proxecto de Voz Natura, leva por título: "A defensa das nosas especies: o noso mellor legado", desta forma preténdese acadar un traballo máis centralizado e globalizado durante todo o curso. Con este plan queremos deixar dalgún xeito marcado o noso compromiso como escola, e como membros da sociedade, co Medio Ambiente, este curso queremos darlle un significado máis profundo, tentando achegar a idea de “herdanza”, en referencia ao recibido, e de “legado”, en canto ao que deixamos ás novas xeracións.

Seguimos na idea de concienciar a toda a comunidade educativa e ao entorno: veciñas e veciños, así como a aquelas persoas que sigan as nosas intervencións e recomendacións, da importancia de coidar e protexer o medioambiente, do valor de participar nun consumo responsable e nunha reciclaxe selectiva dos residuos que producimos e de que todo isto é unha labor na que todas e todos contamos. E todo iso facendo fincapé na temática que nos centrará neste curso escolar: a flora e a fauna autóctonas.

A polución polo plástico continúa a ser o grande azote medioambiental da nosa era, a batalla máis urxente á que debemos enfrontarnos en materia de sostibilidade do planeta. É por iso que este continuará a ser un dos nosos piares a traballar máis directamente: a concienciación de cada un e cada unha ante este problema.

Continuaremos traballando na nosa horta, mellorando e ampliando a zona de cultivo.

Seguiremos a concienciar ao noso alumnado e ás súas familias na responsabilidade das nosas accións e decisións de consumo e os seus efectos sobre o medio ambiente que nos rodea.

E como sempre, estaremos abertas e abertos a calquera iniciativa e proposta medioambiental que poida xurdir (ANPA, Concello, Asociacións...) e na que nós poidamos colaborar e/ou participar en función das nosas posibilidades.

Polo tanto, os obxectivos que pretendemos acadar serán os seguintes:

Coñecer, valorar e protexer as especies autóctonas da nosa contorna, tanto flora como fauna.
Detectar e tratar de eliminar aquelas especies invasoras, no que se refire á fauna, que están presentes na nosa contorna, tratando de dar a coñecer as consecuencias que teñen a súa presenza na mesma.
Capacitar ao alumnado para analizar de forma crítica a información ambiental a través de notas de prensa, radio, televisión, así como parladoiros e outros medios de información.
Favorecer a adquisición de novos valores pro-ambientais e fomentar actitudes críticas e construtivas.
Capacitar ao alumnado no análise de conflitos medioambientais, no debate de alternativas e na toma de decisións para a súa resolución.
Ser o instrumento que favoreza modelos de conduta sostibles en todos os ámbitos da vida, que perdure máis alá dos anos de escola, que sexa o noso legado.
Practicar unha agricultura ecolóxica e orgánica, descubrindo os seus beneficios ambientais e para a saúde, e incidir sobre todo no cultivo daquelas especies autóctonas.
Fomentar a participación e colaboración de toda a comunidade educativa nun proxecto común relacionado co coidado do medio ambiente.
Consolidar o blog “Horta Xoaquín Loriga”, como medio divulgativo do traballo realizado, pero tamén de divulgación e promoción daqueles organismos e asociacións que contribúen á defensa do medio.
Seguir a coidar e mellorar a contorna da escola.
Continuar fomentando o consumo responsable e consciente en todos os aspectos.
Continuar a facer compostaxe dos residuos orgánicos da escola, apreciando o seu valor.
Seguir a insistir na importancia de reducir o uso do plástico nas nosas vidas, incidindo xa dende a escola no material a empregar.