O MAGOSTO

  A festa máis tradicional do mes de novembro é o magosto e dende comezos deste mes estivéronse realizando unha serie de actividades relacionadas co proxecto de centro: "A defensa das nosas especies: o noso mellor legado",  rematando hoxe coa celebración do magosto escolar, onde puidemos degustar unhas saborosas castañas asadas, grazas a cooperación dos nenos e nenas do centro que aportaron un puñadiño de castañas amosegadas. Contamos tamén coa colaboración da anpa "O patio de Loriga" para repartir as castañas, unha cantas mamás puxeron a indumentaria de castañeiras para repartirnos en cestas este froito outonal.

Este San Martiño foi moi creativo, os nenos e nenas do centro contando coa axuda das súas familias fixeron unha recollida de refráns e ditos populares que posteriormente gravaron nun podcast. Confeccionáronse amais murais do outono e unha exposición de maquetas titulada "Minimundo animal de Xoaquín Loriga", onde o alumnado mostrou o seu inxenio empregando elementos do outono (noces, landras, mazarocas de millo, castañas, ourizos, troncos de madeira, follas, piñas...) para elaborar animais do bosque. Aproveitando  este paseo polos soutos, carballeiras, piñeirais, ríos... propúxose ao alumnado que retratasen as paisaxes naturais da nosa contorna con toda a súa biodiversidade e con todas estas imaxes fíxose un video co título: "As cores do outono".