DÍA MUNDIAL DOS OCÉANOS

 Aínda que o Día Mundial dos Océanos é o 8 de xuño no CEIP Xoaquín Loriga de Prado celebrarémolo o luns día 10 visualizando o documental  "Lo que el pulpo me enseñó" e outras curtametraxes que poñen de manifesto a necesidade de coidar dos nosos océanos pois desempeñan un papel fundamental na vida cotiá, xa que son os pulmóns do noso planeta, unha fonte importante de alimentos e medicinas; e unha parte importante da biosfera. Ademais, contamos coa exposición do CEIDA "Áreas mariñas protexidas" situada no corredor do 3º ciclo que nos aporta información sobre este tema.

No 2008 a ONU proclamou o 8 de xuño como o Día dos Océanos co obxectivo de darlle visibilidade ao papel clave que teñen para protexer a vida no noso planeta e amosar o moito que sofren  cos cambios de temperatura derivados do cambio climático. Só un terzo da terra é superficie seca, por iso o noso planeta se ve azul desde o espazo, o resto do planeta é océano, e nel hai vida en todas partes. Grazas á presenza do fitoplancto os océanos producen entre o 50 e o 85% do osíxeno que se libera cada ano, ademais, os mares actúan como un importante sumidoiro de dióxido de carbono, o que reduce considerablemente os niveis de gases de efecto invernadoiro na atmosfera.

Os ecosistemas e os océanos están en perigo e necesitan que actuemos. Ambos son moi importantes para a vida e a nosa obriga é contribuír a que permanezan libres de contaminación. Estes son algúns consellos que se os respectas, axudarás a salvar os ríos, océanos e todos os ecosistemas do  planeta Terra.

Non o dubides e lembra:

1. Utiliza menos produtos de plástico.

2. Fai compras sostibles de produtos de mar.

3. Usa produtos biodegradables nas praias.

4. Non tires lixo nos ríos.

5. Viaxa polo mar responsablemente.

6. Non compres produtos que afectan a vida mariña.

7. Reduce as emisións de gases e o consumo de enerxía.

8. Apoia organizacións que traballan a favor dos océanos. 9. Reduce e recicla.

  💙“Coidar o Medio Ambiente é valorar a Vida”💚